ارباب عشق

 

 

 

او دم کی حرمله ننگین اله تیر و کمان آلدی

 

ملک‌لر ضجه چکدی شیعه‌لر خط امان آلدی

خبر وئر هر مریضه ناامید اولسا معالجدن 

بو طفله آغلاسون تا بهره‌مند اولسون نتایجدن

علاجون ایسته‌سون بوسودامر باب‌الحوائجدن 

کیمه ائتدی طبابت مزدینه اشک روان آلدی

حقیقت گورسنر قلب سلیم و چشم بینایه 

ازلدن حرمله کور اولدی ساتدی دینی دنیایه 

خریدار بهشته بیر اووج قان الده سرمایه 

حسینون سودامر سربازی جان وئردی جنان آلدی 

دیزین برکیتدی یئرده اوخ آتان بیر پهلوان مثلی 

کمان پرتاب و زه تابیده اوخ برق جهان مثلی 

هدف بیر آلتی آیلیق سودامر برگ خزان مثلی 

حسینون خیری اولسون غنچه وئردی گلستان آلدی

 

گور اوچ پر اوخ سودان آیری دوشن بیرماهیه نیلر 

دگه دیوار مسجدده قانادسیز یاهویا نیلر 

ابوالفضلی ییخان بیراوخ گورون شش ماهیه نیلر

باش آیریلدی بدندن قلب زهرادن توان آلدی

 

اوخی چکدی بوغازیندن آتوب قان مثل فواره 

دمادم دولدوروب اووجین ائدوب عرضه خریداره

جنازه اللری اوسته قالوب میداندا آواره 

ندای احسن احسن ذات حقدن ناگهان آلدی

آتانون اللری قان، یوز گوزی قان، آغ محاسن قان 

بالانون ایسلادوب آغ دوشلوگین زیبا لباسین قان 

اولوب باب الحوائج ایلدی تضمین بقاسین قان 

عموسی حضرت عباس تک نام و نشان آلدی

 

نظر اطرافینه سالدی اوزین تک گوردی میداندا 

دئدی قارداشلاریم اوغلوم خدا غرق اولموش آلقاندا 

قالان بیر سودامر سربازیمیدی ذیل پیماندا 

اودا صدساله درسی آلتی آیدا بی‌زبان آلدی

 

بو غمدن پارچالانمیشدی نه طاقتده داغ اولسیدی 

بهارون فصلی سولمیشدی نجه عالی باغ اولسیدی 

بالام ال اوسته قالمازدی ابوالفضلیم ساغ اولسیدی 

گوروب قارداش‌سیزام اطرافیمی بو قوم کوفیان آلدی 

اوزون محشر گونی ای منتقم قیل عدلیلن دیوان 

بو من او حرمله بو اصغر مظلوم او ناحق قان 

ساتان من مشتری سن قان متاعیم قیمتی رضوان 

اوزون وئر خیرینی یارب ساتان ساتدی آلان آلدی

 

بالا از بسکه چیرپیندی آتانون سینه‌سی اوسته 

وئروب جان مرغ بسمل تک ولیکن قول قاناد بسته 

قویوب یوز خیمیه ساری آتا خسته بالا خسته 

اوزاقدان رمزی اول زینب بی‌خانمان آلدی

 

ئوره‌کلندی دئدی قارداش گل خندانوه قربان 

سووا عطشان گئدوب عطشان گلن مهمانوه قربان 

الون اوسته ملک‌لر آغلیان قربانووه قربان 

بودیلسیز نیلمیشدی دشمن آخر قانه قان آلدی

 

دئدی سن اولماسیدون خیمیه باجی گلنمزدیم 

آناسی خیمه‌دن باخسیدی من تَلّی اننمزدیم 

بو حالیله کی سن گوردون گوزونه گورسننمزدیم

ربابه درسی سن وئردون فلک سخت امتحان آلدی 

وداعین وقتی دور باجی فراقه قوی ائدوم تمکین 

عیادت ایلیوم سجادیدن دردی تاپا تمکین 

مریضون یاننه گئتمکده اما وارگوزه‌ل آئین 

گوررسن هر کسی بیر هدیه در حد توان آلدی

 

مریضه دسته‌گل باغلالا بیرخوش رسم و عادتدی

اودور سجاده گتدیم بو گلی وقت عیادتدی 

آپار وئر ایلسون وئرسون سیزه بو یاخشی فرصتدی 

مریض ایلر گلی اوندان گوررسن دیگران آلدی

 

وئرنده هر قیزا اما دئنن آرام آل آغوشه 

یواش باس باغریوا دیسگینمسین الان گئدوب هوشه 

آتوب دوتما بوغازیندن دوباره قان گلر جوشه 

وئرون الدن اله بلکه رباب مهربان آلدی 

آلوبلا قانلی قنداقی اوپن الدن اله وئردی 

بوغازینون یاراسین کیم گوروب زلفین یئله وئردی 

ربابه نوبه چاتدی شاعیره مولا صله وئردی 

سیزیلتیلان ایله نوحه دئدی فیض کلان آلدی

دئدی گر چه غموندن اولمدیم من زنده‌یم اوغلوم 

نقدری کی آدون اوستومده وار پاینده‌یم اوغلوم 

قصوریم اولدی سندن حشره‌جک شرمنده‌یم اوغلوم 

منیم سینم‌ده‌سن بخت اولدوزیدون آسمان آلدی

 

یقینیمدور گجه چوخ اینجیمیشدون ایندی دینجلدون 

یانوردون صبحه‌جک آهون اُوخیله قلبیمی دلدون 

ائوون آباد کوسموشدون گینه آغوشیمه گلدون 

کأنه آلتی آیلیق دستمزدین باغبان آلدی

زنده یاداستادمنزوی اردبیلی

نظرات شما عزیزان: